Pas fitores 2-1 ndaj Arabisë Saudite, testi i radhës për Italinë e Mancinit do të jetë në Nicë, për ballë Francës. Kjo shikohet edhe si ndeshja ideale për të parë se sa ka ndryshuar këto ditë kombëtarja italiane dhe sa mund të shpresojë për një ringritje të shpejtë, në nivelet që i takon.
Për këtë sfidë tekniku i sapoemëruar pritet të konfirmojë sërish skemën 4-3-3, por është tashmë e konfirmuar që do të ndryshojë disa prej lojtarëve, krahasuar me sfidën ndaj sauditëve.
Kështu në portë do të zbresë nga minuta e parë Perin, ai që shikohet si i preferuari i Mancinit për të pasuar Buffonin, ndërsa në mbrojtje, në krah të Bonuccit do të luajë Caldara. Krahët do t’i besohen De Sciglios dhe Criscitos, ndërsa mesfusha do të përbëhet nga Jorginho, Bonaventura dhe Cristante.
Në sulm do të konfirmohet Insigne, si një titullar fiks, ndërsa partnerët e tij do të jenë Belotti dhe Verdi. Sfida Francë-Itali do të luhet të premten më 1 Qershor, në orën 21:00 dhe do të transmetohet live nga Supersport.
