Francesco Bagnaia fitoi garën e dytë virtuale në Moto Gp, së cilës këtë herë ju bashkua dhe Valentino Rossi me Yamahan e tij por dhe Andrea Pirro me Ducati. Piloti i Pramac Racing Bagnaia mundi në një duel emocionues në vijën e finisht Maverick Vinalesin, në një garë që pavarësisht se pilotët garuan nga poltronat e shtëpisë së tyre pati shumë emocione dhe parakalime aq sa u vendos pothuajse në fotofinish.
Alex Marquez, i cili pati fituar garën e parë virtuale këtë herë u kënaq me vendin e 3-të ndërsa pas tij u rendit i vëllai, Marc Marquez me Repsol Honda. Valentino Rossi e përfundoi garën vetëm në vendin e 7-të me pothuajse 2 sekonda më tepër sesa fituesi i garës teksa Bagnaia regjistroi gjithashtu dhe kohën më të mirë në një xhiro gjatë kësaj gare. Vetë piloti i Pramac Racing theksoi se fakti që këtë herë diferencat ishin shumë të vogla mes pilotëve e bëri që ta shijonte më tepër suksesin.