Trajneri Gasperini u ankua jo pak për merkaton e vakët, por si shpërblim mori një tjetër largim me peshë nga skuadra e Atalantës. Bëhet fjalë për mesfushorin zviceran Remo Freuler, i cili është transferuar në Premier League te skuadra e Nottingham Forest.
Marrëveshja është arritur në orët e vona të mbrëmjes së të mërkurës, me Atalantën që do të përfitojë rreth 12 milionë euro, bashkë me bonuset, ndërsa vetë mesfushori do të firmosë një kontratë 3-vjeçare me britanikët.
Pasditen e të enjtes Freuler zbarkoi në Angli për të kryer testet mjekësore dhe për t’u bashkuar menjëherë me klubin e ri, duke i dhënë fund eksperiencës 6-vjeçare me zikaltrit, ku numëron më shumë se 200 ndeshje.
Freuler ka qenë padyshim një element mjaft i rëndësishëm i Atalantës dhe shpesh i konsideruar motor i mesfushës bashkë me Marten De Roon.
