Java e 30-të e “Abissnet Superiore” prodhoi rezultate interesante, duke lënë gjithçka të hapur sa i përket zonës europiane, por edhe mbijetesës. Tirana nuk ia doli përballë Kastriotit në këtë javë për të “firmosur” titullin kampion, ndërsa në fundin e tabelës, Dinamo dhe Skënderbeu janë pothuajse me një “këmbë” në Kategorinë e Parë.
Raundi i 30-të prodhoi vetëm tre gola, tre fitore në transfertë dhe dy barazime pa gola. Këto të fundit u regjistruan në dy sfida që në prag të javës konsideroheshin të rëndësishme për zonën europiane, por në fund asgjë nuk ndryshoi.
Vllaznia, Partizani, Kukësi dhe Laçi nuk ia dolën të gjenin rrugën e rrjetës, ashtu si Dinamo, Tirana dhe Skënderbeu.”Blutë” e kryeqytetit ishin përsëri “pa busull”, një moment që e shfrytëzoi në maksimum Teuta, që falë “dhuratës” së Simonit, kampionët e Shqipërisë siguruan tri pikë me shumë vlerë. Në Korçë, Egnatia iu fal “perlës” së Demir Imeri-t që i dhuroi skuadrës nga Rrogozhina tri pikë të arta dhe në krahun tjetër “fundosi” Skënderbeun.
Në fundin e sezonit, kur llogaritë ende nuk janë mbyllur, “frika” për të rrezikuar duket se mbizotëron më shumë se dëshira dhe nevoja për të fituar dhe diçka të tillë e konfirmoi kjo javë, me vetëm tre gola në 45 minuta lojë. Një statistikë e tillë për herë të fundit u regjistrua në javën e 24-të, në një raund ku u shënuan vetëm katër gola.
