Përfaqësuesja e Kosovës është mbyllur në mënyrë hermetike gjatë grumbullimit në Prishtinë për dy ndeshjet e shtatorit në Ligën e Kombeve. Kontaktet në hotelin ku po qëndron ekipi kanë qenë të limituara edhe për familjarët, ndërsa dy stërvitjet të cilat janë mbajtur në Prishtinë kanë qenë të mbyllura për mediet.
Të gjitha këto masa janë marrë për shkak të gjendjes aktuale dhe rasteve të shumta me COVID-19 në Kosovë. Vetëm para pak ditësh Drita dhe Prishtina humbën ndehjet në arenën ndërkombëtare, pasi patën lojtarë të infektuar. Të alarmuar nga precedentët FFK ka vendosur që shtabi teknik dhe lojtarët të kenë sa më pak kontakte që të jetë e mundur me persona të jashtëm.
Në Kosovë aktualisht janë 3 227 raste aktive me Koronavirus, me numrin e përgjithshëm që ka shkuar në 13 601. Vetëm ditën e martë janë konfirmuar 147 raste pozitive. Pikërisht këto shifra kanë bërë që shumë klube të hezitojnë t’i lejojnë lojtarët kosovarë për të udhëtuar në Prishtinë, siç ishte rasti i Milot Rashicës apo i lojtarëve të tjerë që luajnë në Zvicër. U nevojitën diskutime ekstra mes FFK-së dhe klubeve për t’i liruar lojtarët që t’i bashkoheshin ekipit të paktën për ndeshjen që zhvillohet në Itali.
Aktualisht, Bernard Challandes ka në dispozicion 15 futbollistë me të cilët ka planifikuar dy seanca stërvitore në “Fadil Vokrri”, ndërsa Rashica, Kryeziu, Voca, Kololli dhe Xhemajli do t’i bashkohen ekipit në Parma, të mërkurën, ku edhe do të zhvillohet seanca e fundit stërvitore para përballjes me Moldavinë.