Sergio Busquets ndodhet në vitin e fundit të kontratës dhe pritet t’i japë lamtumirën Barcelonës në fund të sezonit për të nisur një aventurë në MLS, aty ku ka admirues të shumtë. Drejtuesit e klubit katalanas kanë piketuar një adoleshent brazilian si pasardhësin e kapitenit.
Ai është Andrey Santos, 18-vjeçari i Vasco da Gama që garon në divizionin e dytë. Mundo Deportivo raporton se me këtë operacion po merret personalisht Jordi Cruyff, drejtori sportiv i Barcelonës, i cili po tenton të arrijë një marrëveshje me agjentin e mesfushorit dhe drejtuesit e klubit brazilian.
Për Santos ka interesim konkret edhe nga Newcastle, që ka gati 35 milionë euro për ta transferuar në “St James Park”. Ndërkohë, klauzola e shitjes së adoleshentit është 40 milionë euro. Santos luan si qendërmesfushor dhe si “shkatërrues”, dhe këtë sezon numëron 7 gola.
Ai pëlqehet edhe nga Manchester City. Pep Guardiola e vlerëson shumë dhe drejtuesit e kampionëve të Anglisë po monitorojnë situatën për momentin, ndërkohë që Cruyff po nxiton që të firmosë me të në merkaton e janarit për t’i dhuruar trajnerit Xavi një talent në mesin e fushës.