Stadiumi Elbasan Arena nuk do të jetë në dispozicion të Partizanit dhe Kukësit për të paktën dy javë pasi FSHF ka marrë vendimin ekstrem për të mbyllur stadiumin “Elbasan Arena” për të paktën dy javë. Shirat e shumtë të ditëve të fundit dhe për më tepër zhvillimi aty i ndeshjeve si pritës nga klubet e Partizanit dhe Kukësit, ka bërë që në institucionin e futbollit shqiptar të mbyllin stadiumin për të mos rënduar edhe më tepër gjendjen e tapetit.
Ndaj edhe me shumë gjasa, tashmë ndeshjet mund të spostohen në Shkodër, e ndoshta Durrës, ndërsa në funksion pritet që të vihet edhe “Selman Stërmasi”, aq më tepër që po afrojnë edhe ndeshjet e kombëtares kuqezi. Në këtë mënyrë Kukësi do të jetë i detyruar të luajë në Shkodër ndërsa Partizani në Selman Stërmasi.