Pas ngjarjes në ndeshjen e kampionatit të futbollit të femrave midis Partizanit dhe Bilishtit, ku tre nga futbollistet e skuadrave mike shfaqën probleme shëndetësore dhe u dërguan për ndihmë mjekësore, ka reaguar edhe Federata Shqiptare e Futbollit.
Në një komunikatë zyrtare, FSHF-ja sqaron se vajzat që humbën ndjenjat, u shoqëruan menjëherë drejt një spitali privat në kryeqytet, ku kryen të gjithë ekzaminimet mjekësore dhe tashmë kanë lënë klinikën.
Ja komunikata e FSHF-së:
Federata Shqiptare e Futbollit dëshiron të sqarojë dramën e klikimeve të krijuara ditën e sotme në lidhje me ndeshjen Partizani-Bilisht Sport, e vlefshme për javën e parafundit të Kampionatit Kombëtar të Futbollit të femrave.
Gjatë zhvillimit të ndeshjes së vlefshme për javën e 21-të të kampionatit, 3 vajza të ekipit juglindor kanë shfaqur gjendje të fikëti. Menjëherë vajzat janë shoqëruar në Spitalin Amerikan nga Ambulanca, e sjellë nga klubi pritës, FK Partizani, që kanë qëndruar së bashku me delegatin e ndeshjes, pranë vajzave.
Tre futbollistet pasi kanë kryer analizat e nevojshme kanë lënë ambientet e Spitalit. I bëjmë thirrje të gjithë mediave që të jenë shumë të kujdesshme në raportimin e ngjarjeve të tilla, duke parë që kanë të bëjnë me emocione të lojtareve, prindërve dhe të afërmve të tyre. Në garën e ekskluziveve dhe klikimeve duhet të tregojmë së paku humanizëm dhe profesionalizëm.