Vetëm 4 ditë pas humbjes befasuese në shtëpi përballë Ferizajt, Feronikeli do të rikthehet në fushë, këtë herë për të diskutuar sfidën e parë gjysmëfinale të Digitalb Kupës së Kosovës, përballë Ballkanit.
Skuadra nga Drenasi vijon të kryesojë renditjen e IPKO Superligës, me dy pikë më tepër se Prishtina ndjekëse, por ndryshe nga kryeqytetasit, ka shanse edhe për të synuar të dy trofetë sezonalë.
Përballë Ballkanit, Feronikeli është dukshëm i avantazhuar, pasi vendasit janë të përqendruar te misioni për të mbijetuar mes më të mirëve të futbollit kosovar, ndërsa skuadra nga Drenasi nuk mund të humbë një mundësi të artë për të mbyllur sezonin me trofe.
Sfida tjetër gjysmëfinale, që do të luhet po pasditen e sotme, është ajo mes gjakovarëve të Vëllaznimit, që militojnë në ligën e parë kosovare dhe skaudrës nga Mitrovica, Trepça ’89.
Gjakovarët i shkuan shumë pranë triumfit në këtë kompeticion edhe sezonin e kaluar, por humbën në finale përballë Prishtinës, vetëm pas ekzekutimit të 11-metërshave.
Sfida e parë në Gjakovë, do të jetë ajo që pritet të vendosë shumë sa i përket skuadrës që do të mund të kalojë në finale, pasi vendasit besojnë shumë te faktori fushë, për të marrë një rezultat pozitiv.
Të dy takimet do të startojnë në orën 15:00 dhe do të transmetohen konkretisht në Supersport 2 dhe 3.