Xhuliano Skuka ishte i pafat në ndeshjen gjysmëfinale të Kupës së Shqipërisë përballë Vllaznisë, teksa ishte i vetmi nga pesë lojtarët e Partizanit që gaboi nga goditjet e penalltisë. Në këtë formë, të kuqtë nuk ia dolën të mbërrinin në finale, me skuadrën e trajnerit Dritan Mehmeti që tashmë mundësinë për t’u kualifikuar në Europë duhet ta kërkojë vetëm nga kampionati.
Sulmuesi i cili në këtë sezon me të kuqtë ka ditur të jetë vendimtar duke shënuar tetë gola mes kampionatit dhe Kupës, u pa në lot pas eliminimit të Partizanit, ndërkohë që nëpërmjet rrjeteve sociale i ka bërë edhe një premtim tifozerisë së kuqe.
23-vjeçari është i bindur se me paraqitjet në të ardhmen do ta bëjë të harrohet shpejt mbrëmja e Loro Boriçit, ndërsa shton se ka nevojë për besimin e tifozerisë së tij.
