Burkina Faso është çerekfinalistja e parë e Kupës së Afrikës. Përfaqësuesja e drejtuar nga trajneri Malo mposhti pas goditjes së penalltive Gabonin në një ndeshje të cilën Burkina e kërkoi disi më shumë fitoren dhe e gjeti në fund. Burkina Faso humbi një 11-metërsh me sulmuesin e Aston Villas, Bertrand Traore që në minutën e 18-të ndërkohë që shifrat u zhbllokuan nga i njëjti lojtar 10 minuta më vonë.
Gaboni edhe pse ishte pa dy yjet e ekipit Aubameyang dhe Lemina nuk u dorëzua dhe në fundin e pjesës së parë barazoi shifrat por goli u anulua nga VAR. Megjithatë një autogol i vonë në minutën e 91-të nga Guira i dha të drejtë Gabonit që arriti ta çonte ndeshjen në shtesë. 30 minutat e dy kohëve shtesë nuk prodhuan gol me ndeshjen që u zgjidh pas goditjes së penalltive. U goditën nga plot 9 penallti për secilën skuadër me Burkinën që fitoi 7-6 duke prerë biletën e parë çerekfinale të këtij edicioni të Kupës së Afrikës.
Kualifikohet në çerekfinale edhe Tunizia, që mposhti minimalisht me gol të Msakni Nigerinë. Në fazën e tetë më të mirave do të përballet pikërisht me Burkina Fason.
