Genaro Gattuso ka dalë në konferencën e zakonshme për shtyp, nga Londra, ku Milani i tij po përgatitet që të përballet me Arsenalin, të enjten në orën 19:00.
Në sfidën e vlefshme për fazën e 1/8-ave të Europa Leagues, kuqezinjtë do të synojnë të marrin një rezultat pozitiv, për të synuar kualifikimin në ‘San Siro’, një javë më vonë. Nga ana tjetër, edhe Arsenali kërkon kualifikimin, për të shpëtuar një sezon, ku është eliminuar nga të gjithë kompeticionet dhe thuajse ka mbetur jashtë zonës Champions.
Trajneri i Milanit vlerëson kundërshtarin, si një skuadër e mbushur me kampionë dhe bën thirrje që skuadra të luajë pa frikë në ‘Emirates Stadium’, para një publiku të zjarrtë.
“Arsenali është një skuadër që ka shumë futbollistë kampionë në përbërje. Pavarësisht problemeve të kohëve të fundit, ata janë të aftë të nxjerrin skuadrën nga situate dhe të fitojnë atëherë kur duhet. Nga ana tjetër, Wenger ka një eksperiencë shumë më të madhe se unë në sfida të tilla dhe do të dijë të menaxhojë situatën. Gjithsesi, ne mund t’ia dalim, nëse luajmë pa frikë, para 70 mijë tifozëve që pritet të jenë të pranishëm. Po ruajtëm qetësinë dhe përqendrimin, çdo gjë do të jetë më e lehtë për sfidën e ardhshme”, u shpreh Gattuso.