Lajmi më i bujshëm që erdhi sot nga Italia, ishte ai që fliste për një tentativë të drejtuesve të Milanit, për të rikthyer në skuadër sulmuesin gjigant suedez, Zlatan Ibrahimoviç, i cili aktualisht luan në Shtetet e Bashkuara të Amerikës, me Los Angeles Galaxy.
Drejtuesit e kuqezinjve dëshirojnë të përfitojnë nga përfundimi i kampionatit në SHBA dhe të sjellin sulmuesin 37-vjeçar në Milano, për të luajtur gjatë vitit të ardhshëm, në pjesën e dytë të sezonit.
Vetë tekniku i Milanit, Genaro Gattuso foli sot në konferencën për shtyp para ndeshjes me Olympiacosin në Europa League, teksa komentoi edhe zërat për afrimin e Ibrës te skuadra e tij, duke filluar që nga muaji Dhjetor.
“Ibrës i uroj një ditëlindje të gëzuar. Ka pësuar një dëmtim të ashpër, por ka ditur të rikthehet i madh dhe të shënojë gola. Më shumë se kaq unë nuk mund të flas, pasi kam detyrimin të komentoj vetëm për lojtarët e mi”, deklaroi Gattuso.
Trajneri i Milanit foli më pas për Gonzalo Higuainin, i cili do të rikthehet të luajë nesër ndaj grekëve, ndërsa bëri edhe krahasimin mes argjentinasit dhe Ibrahimoviçit, duke evidentuar disa diferenca mes tyre.
“Higuain nuk ka fizikun e Ibrës, por është shumë teknik dhe ka cilësi mjaft të mira, për të lëvizur dhe për të krijuar superioritet në momente të caktuara. Edhe në stërvitje, argjentinasi është shumë I qeshur dhe shkakton shumë humor, ndërsa Ibra është më serioz në këtë pikëpamje”, rrëfeu Gattuso.