Enis Gavazaj ishte futbollisti më i mirë i sfidës mes Skënderbeut dhe Partizanit, që u vendos nga autogoli i Gojkoviç. Sulmuesi nga Zhuri i Prizrenit, ishte nga më të lëvizshmit te korçarët, duke u shndërruar në një problem për Partizanin.
“U munduam të japim më të mirën tonë dhe të zbatojmë detyrat që na kishte dhënë trajneri, por Partizani u mbrojt vërtetë shumë mirë, duke dubluar pozicionet. Mendoj se kundërshtari bëri një ndeshje mjaft të mirë, por nuk pati fat, për të marrë më shumë”, u shpreh Gavazaj.
Skënderbeu mori një tjetër 3-pikësh, pavarësisht problemeve që ka skuadra jashtë fushës së lojës. Gavazaj vlerëson se kanë qenë lojtarët me eksperiencë ata që kanë kthyer qetësinë në ekip, ndërsa tregoi se komplimentoi edhe Asanin e Partizanit.
“Asani është një lojtar që lëviz shumë mirë dhe sot e urova për lojën që zhvilloi. Problemet kanë ndikuar shumë pak te ne dhe kjo falë lojtarëve më me eksperiencë të skuadrës, që na kanë mbajtur të përqendruar dhe jashtë këtyre problemeve”, tha Gavazaj.
