E shtunë e errët për disa nga trajnerët e Kategorisë Superiore. Pas Franco Lerdas dhe Bledi Shkëmbit, mësohet se është shkarkuar edhe tekniku i Luftëtarit, Jorgos Marantas (pritet të zyrtarizohet nga klubi).
Rezultoi e pamundur përpjekja e trajnerit grek për të ndryshuar situatën në Gjirokastër, ku humbjet apo rezultat negative pasonin njëra-tjetrën.
Dështimi i radhës 0-4 ndaj Laçit, ka bërë që në klubin gjirokastrit t’u soset durimi. Mungesa e rezultateve, por edhe përplasja me lojtarë të ndryshëm kishin bërë që situata të përkeqësohej ndjeshëm dhe të mungonte edhe loja, ndaj largimi i Marantasit ishte zgjedhje e detyruar.
Mbetet për t’u parë se cili trajner do të pranojë të marrë drejtimin e një skuadër që premton shumë pak me organikën që ka. Gjithsesi, gjithçka do të varet edhe nga premtimi që do të bëjnë drejtuesit për merkaton e janarit.