Manchester United shpenzoi 105 milionë euro për Paulo Pogba në verën e vitit 2016 për ta humbur si lojtar të lirë pas gjashtë vitesh. Mesfushori francez fitoi Europa League dhe EFL Cup në sezonin e parë pas rikthimit në “Old Trafford”.
Më pas shumë paraqitje nën ritëm. 29-vjeçari është kritikuar shumë gjatë këtyre viteve për sjelljen e tij dhe mungesën e rendimentit në fushën e blertë. Zërat e merkatos e lidhin me një rikthim te Juventusi, ndërkohë që Gary Neville është ndalur sërish tek ai.
Ish-mbrojtësi i njohur i “Djajve të Kuq”, aktualisht në rolin e opinionistit në Sky Sports, përmblodhi gjashtë vitet e Pogba me Manchester United në dokumentarin që Amazon ka përgatitur për kampionin e botës me Francën.
“Mendoj se gjashtë vitet e Pogba në Manchester të lënë një shije të hidhur, gjashtë vite zhgënjyese. Nuk më interesojnë komentet e tij në Pogmentary.
Kur një futbollist vendos të largohet, ai mund të flasë çfarë të dojë, por unë nuk mendoj se Paul ka bërë mirë në gjashtë vitet e fundit”, deklaroi Neville.