E nisi me fitore fazën e dytë në Gjermani edhe ekipi i Bayer Leverkusenit, që mundi jashtë fushe Paderbornin me rezultatin e thellë 1-4. Në “Benteler Arena”, përpara 15.000 spektatorëve, mesfushori i përfaqësueses kuqezi, Klaus Gjasula, e filloi ndeshjen si kapiten i ekipit vendas, gjithsesi gjërat për Paderbornin precipituan shpejt, pasi “aspirinat” realizuan dy herë në harkun e vetëm çerek ore lojë, me anë të golashënuesit të tyre më të mire, Kevin Volland.
Fillimisht 27-vjeçari shënoi një “11-metërsh” me kokë, ndërsa tre minuta më vonë Volland u tregua i vëmendshëm për të shtyrë topin sërish me kokë, këtë herë nga shumë pranë portës.
Baumgartlinger realizoi golin e tretë për miqtë që në fraksionin hapës, pas gabimeve në seri të portierit Zingerle. Ekipi i Paderbornit ngushtoi diferencën në fillimin e pjesës së dytë me anë të sulmuesit Dennis Srbeny, që përfitoi nga topi i kthyer nga portieri pas goditjes së Gjasulës, ndërsa çerek ore para fundit i mbylli përfundimisht llogaritë pikërisht “ylli” i ekipit, 20-vjecari Kai Havertz.