Klaus Gjasula rikthehet me gol në formacionin e Paderbornit, pas mungesës në ndeshjen e javës së kaluar ndaj Wolfsburgut për arsye kartonësh. Mesfushori i Kombëtares Shqiptare, i cili u fut në lojë si zëvendësues në përballjen e vështirë në transfertë me Schalken, realizoi golin e barazimit 1-1 në minutën e 81-të, duke i siguruar një pikë, që vlen më shumë për moralin e skuadrës së tij, që mbyll klasifikimin e Bundesligës me 16 pikë. Gjasula e dërgoi me kokë topin në rrjetë pas ekzekutimit të këndores, teksa më herët për vendësit kishin zhbllokuar rezultatin me Kutucu.
Rrezikon seriozisht rënien nga kategoria Werder Bremeni, ku aktivizohet Milot Rashica, pasi humbi 0-2 në shtëpi përballë Union Berlinit me të dy golat e sfidës të shënuar nga Butler. Kjo ishte disfata e tretë radhazi për Werderin, që renditen në vendin e parafundit me 17 pikë. Shmangu krizën e mëtejshme të rezultateve Freiburgu, që fitoi 1-0 ndaj Hoffenheimit me gol të Waldtschmitd.
Wolfsburgu barazoi 1-1 me Dusseldorfin (Stefen 55’/Zimmerman 13’), ndërsa Hertha e Berlinit u mposht në fushën e saj 1-3 nga Mainzi.