Mike Tyson e pati të vështirë të ringjitej në nivele të larta pas dështimit me Holyfield, pavarësisht se konkurroi edhe një herë për titull duke u dorëzuar ndaj Lewis.
Ai person që më së shumti i ngjan për mënyrën e të boksuarit, por që nuk është nga Brooklyn, por nga Bulqiza, mësoi të ngrihej në këmbë pas një dueli të humbur, jo për shkak të forcës së kundërshtarit, por për probleme fizike.
Gjetan Keta do të rikthehet të boksojë në atdhe dhe do ta bëjë në Dibër të Madhe. Pasi triumfoi përballë kolumbianit Caceres në Qershor, “Iron Mike” shqiptar do të sfidojë boksierin nga Meksika, Paul Venezuela Junior.
31-vjeçari numëron 23 fitore në boksin profesionist, 16 prej të cilave me “knock-out” dhe 7 humbje, ndërkohë që për luftëtarin kuqezi ky do të jetë dueli i 27 në karrierën në nivelin profesionist.
Supersfida do të zhvillohet më datë 8 Shtator dhe do të jetë një tjetër mundësi që Gjetani të ngjisë shkallët për të siguruar sërish një ndeshje titulli. Ndërkohë që në po të njëjtën ditë do të ngjitet në ring edhe Ferit Keta.
29-vjeçari do të ketë si kundërshtar turkun Fatih Mehmet Karakus, një duel i vështirë, por që gjithsesi sheh si favorit djaloshin nga Bulqiza, i cili deri më tani ka një rekord të përsosur në boksin profesionist prej 10 fitoresh, 7 prej të cilave me knock-out dhe asnjë disfate.
