Me tre gola të shënuar në harkun kohor të 7 minutave dhe një tjetër në sekondat e fundit të lojës, Gjilani ka mposhtur 4-0 Ferizajn dhe ka mbajtur hapin e Ballkanit kryesues në IPKO Superligën e Kosovës.
Skuadra e drejtuar nga Gentian Mezani kaloi në avantazh në minutën e 26’ me anë të Fiton Hajdarit, ndërsa në të 30-ën ishte i njëjti futbollist që dyfishoi shifrat, para se Bushic të vinte në kasafortë fitoren në të 33-tën.
Minutat në vijim Gjilani administroi mirë avantazhin, duke kursyer edhe energjitë, ndërsa para se të vinte vërshëllima finale e takimit, kishte kohë edhe për një gol të katërt, që vulosi suksesin e vendasve.
Nuk ia doli të marrë tre pikët ndërkohë ,skuadra tjetër e Gjilanit, Drita që u mposht me rezultatin minimal 1-0 në kryeqytet nga kuqezinjtë e Flamurtarit. Këta të fundit vinin në një moment shumë të vështirë pas dy humbjeve radhazi, por sot bënë reagimin e duhur, duke shënuar në minutën e 77’ dhe marrë 3 pikët.
Pas javës së 13, kampionati kryesohet nga Ballkani me 29 pikë, i ndjekur nga Gjilani me 27 dhe Drita e Prishtina me 24 pikë, ndërsa në fund mbetet Dukagjini me vetëm 8 pikë të grumbulluara.