Lajm i mirë për ekipin e Gjilanit pak ditë pasi rinisi stërvitja për skuadrat e IPKO Superligës së Kosovës. Futbollistët, stafi teknik dhe punëtorët e “skifterëve” kanë rezultuar të gjithë negativë në testet për COVID-19. Në këtë mënyrë, ekipi i drejtuar nga Mezani mund t’i vijojë i qetë përgatitjet për t’i bërë mbylljen e duhur sezonit.
Njoftimi i Gjilanit:
“SC Gjilani njofton opinionin se ka përfunduar me sukses testet për COVID-19. Futbollistët, stafi teknik dhe personeli i klubit u janë nënshtruar testeve mëngjesin e së premtës në Institutin e Shëndetit Publik në Gjilan dhe të gjithë kanë rezultuar negative.
Skuadra merr kështu konfirmimin për t’i vijuar seancat stërvitore në prag të rifillimit të edicionit 2019/20.
Gjithashtu, Sport Club “Gjilani” bën thirrje që të tregoheni të kujdesshëm dhe të respektoni rregullat e vëna nga Instituti Kombëtar i Shëndetësisë Publike në Kosovë.”