Goli i Dabiqajt në pjesën e parë i mjaftoi Gjilanit për të regjistruar fitoren në ndeshjen e parë ndaj Liepajas. Skuadra e Zekirija Ramadanit ka udhëtuar drejt Letonisë për të administruar avantazhin e ndeshjes së parë e të kalojë në fazën tjetër, ku e pret një emër i madh si Young Boys.
Ekipi nga Gjilani merr pjesë për herë të dytë në kompeticionet ndërkombëtare, por nuk ka arritur që të shkojë në turin e dytë.
Ndeshja e parë dëshmoi se nuk ka shumë diferenca mes dy ekipeve, por duhet shumë kujdes ndaj Liepajas, pasi tregoi se mund të krijojë probleme e në shtëpinë e saj do të bëjë gjithçka për të zhvlerësuar ndeshjen e parë.
Ndeshja e kthimit do të jetë një mision i vështirë për skuadrën e Ramadanit, që edhe me barazimin e merr kualifikimin.