Kylian Mbappe shënoi dy gola të bukur në takimin Francë-Poloni (3-1). Sulmuesi i PSG-së kryeson renditjen e golashënuesve në Katar 2022 me pesë gola, ndërkohë që pas ndeshjes shpjegoi edhe pse nuk u paraqit për të folur për mikrofonat e FIFA-s.
“E di që ka pasur shumë pyetje se pse nuk kam folur, por asgjë personale kundër gazetarëve apo kundër askujt tjetër. E kam gjithmonë të nevojshme të fokusohem te kundërshtari dhe kur dua të fokusohem te diçka, duhet ta bëj 100 për qind dhe të mos harxhoj energji për diçka tjetër.
Prandaj nuk desha të prezantohem para shtypit. Së fundmi mësova se Federata do të gjobitet. Unë e marr përsipër ta paguaj personalisht gjobën, Federata nuk duhet të paguajë për një vendim që është personal.
Botërori? Sigurisht që Kupa e Botës është një obsesion dhe fiksim për mua, është turneu i ëndrrave të mia dhe jam me fat që e luaj. Jam përgatitur që të vija këtu sa më mirë në aspektin fiziko-mendor. Për momentin po shkon gjithçka mirë, por jemi ende shumë larg nga objektivi që i kemi vendosur vetes, fitorja e Kupës së Botës”, deklaroi 23-vjeçari francez.