Debutim “i hidhur” i Ernest Gjokës në stolin e Vllaznisë. Skuadra shkodrane u mposht 0-1 në “Loro Borici” nga Partizani, falë golit të afrimit të verës Basrak, i cili ishte preferuar titullar nga Mark Iuliano, për shkak të dëmtimit të Xhevahir Sukajt. Sulmuesi zvicëran me origjinë serbe, goditi saktë me kokë në minutën e 4-rt pas krosimit të Trashit, duke festuar golin e parë në Superiore me fanellën e Partizanit. Ky finalizim i shpejtë ia prishi të gjitha planet Gjokës, përsa i përket mënyrës sesi e kishte përgatitur ndeshjen, pasi Partizani e administroi me qetësi lojën, për të marrë fitoren e tretë radhazi, duke mos lëshuar më shumë terren ndaj dy skuadrave kryesuese, Skënderbeut dhe Kukësit. Vllaznia me këtë humbje, që ishte e dyta radhazi në Superiore, mbetet në kuotën e 5 pikëve, aq sa ka edhe Lushnja.
Pas një kartoni të kuq ndaj Lushnjes dhe një penalltie të shkaktuar ndaj Laçit, Ditmar Bicaj bëhet heroi i Flamurtarit në ndeshjen ndaj Kamzës, duke shlyer gabimet e sfidave të mëparshme. Mbrojtësi shtatlarte realizoi golin e vetëm me kuqezinjtë që në Vlorë kaluan 1-0 Kamzën në javën e 7-t të Superiores, duke u ngjitur në vendin e 3-të në kuotën e 12 pikëve. Në stadiumin Flamurtari sfida u ndërpre për pak minuta për shkak të ndërprerjes së energjisë elektrike. Por me ardhjen e ndriçimit Flamurtari i Shpëtim Duros pak minuta më vonë në të 82-tën gjeti golin e fitores me Bicajn.
E shtunë
Luftëtari – Kukësi 0-3
Lushnja – Laci 0-3
E diel
Vllaznia – Partizani 0-1
Flamurtari – Kamza 1-0
E hënë
Teuta – Skënderbeu 17:00
