Jashtëzakonisht i kënaqur Ernest Gjoka. Trajneri i Vllaznisë vlerësoi paraqitjen e skuadrës në sfidën ndaj Teutës me shkodranët që morën fitoren e 2-të rradhazi në kampionat duke iu larguar disi fundit të renditjes. Gjithsesi Gjoka qëndron me këmbë në tokë pasi sipas trajnerit Vllaznia ka ende shumë punë për të bërë nëse dëshiron të qëndrojë në elitën e futbollit shqiptar edhe sezonin e ardhshëm.
“Gradualisht po fillojmë të marrim atë besimin që na kishte munguar. Me 2 fitoret radhazi kemi hedhur pas krahëve ato 2 humbje në 2 ndeshjet e para të këtij viti, megjithatë jemi në një pozicion delikat pasi duhet të vazhdojmë me këtë ritëm. Kemi fituar një farë qetësie pasi pikët të japin atë besimin që të duhet, por duhet shumë punë për të nxjerrë Vllazninë nga kjo situatë e turbullt në të cilën ndodhet”.
Afrimet e merkatos së janarit po japin efektin e tyre në skuadër dhe ky është një sinjal inkarujues sipas Gjokës që Vllaznia të gjejë vazhdimësinë.
“ Kemi ndryshuar shumë lojtarë në merkaton e janarit, me spostimin e Orelesit në mesfushë kemi ndërruar pothuajse 50% të formacionit, dhe besoj që këto 2 fitore radhazi do t’i shërbejnë skuadrës për vazhdimësinë pasi kampionati është shumë i fortë dhe shumë i gjatë”.
