Kalimi në raundin e dytë të Europa Leagues ishtë një sukses mëse i merituar për Laçin, por duket se aventura europiane e kurbinasve do të përfundojë këtu. Humbja 3-0 në “Aker Stadion” kundër norvegjezëve të Moldes me të gjtiha gjasat e ka vulosur fatin e bardhezinjve, megjithatë mbrojtësi Eglentin Gjoni nuk i ka dorëzuar ende armët pavarësisht se kualfikimi duket gati gati një utopi.
“Rezultati 3-0 është i rëndë, i vështirë, por sikurse kundër Anorthosis kishim besim dhe ia dolëm. Tani luajmë ndaj një ekipi më të vështirë, por mundësitë janë”.
Kundërshtari u tregua superior në takimin e parë, dhe çasti më vendimtar i sfidës ishte ai 11 metërsh i akorduar në favor të skuadrës së Solskjaer që në minutën e 6-të. Penalltia e realizuar nga Haland theu balancat dhe ja vështirësoi shumë detyrën laçianëve.
“Kundërshtari ishte më i fortë dhe normalisht raundi i dytë është më i vështirë, por penalltia në golin e parë na i preu gjunjët.”
25-vjeçari ka qënë një pikë referimi tek Laçi dhe dëshira e tij është të vijojë me kurbinasit megjithatë e ardhmja mbetet e panjohur për qëndërmbrojtësin.
“Jam shumë mirë këtu, me presidentin kam marrëdhënie shumë të mira. Le t’ia lëmë kohës”.