Lushnja tashmë praj kohësh e ka shkruar fatin e saj, teksa ndalesa e radhës në kampionat do të jetë ndaj Partizanit. Trajneri i “lagunarëve”, Ilir Gjyla, është i vetëdijshëm për shkallën e lartë të vështirësisë që ofron sfida ndaj të kuqve, por pavarësisht këtij fakti ai deklaron se ekipi do të mundohet të japë më të mirën, pavarësisht dëmtimeve të shumta që kanë pushtuar skuadrën kohët e fundit.
Është një ndeshje si të tjerat, kërkon mobilizim, do ta kemi të vështirë ndaj Partizanit, që ka një përbërjëe shumë të mirë. Do të vazhdojmë të luajmë futboll, por kemi probleme me lojtarët, shumë prej të cilëve janë të dëmtuar.
Ndaj të Partizanit Gjyla deklaroi se do të aktivizojë lojtarë të rinj, i detyruar edhe për shkak të mungesave, teksa shton se kujdesi do të jetë maksimal nga ana e të gjithëve.
Duhet të provojmë lojtarë të rinj, për të arritur objektivat tanë. E them këtë jo për t’u justifikuar për ndeshjen, aboslutisht jo. E kam thënë edhe herë të tjera, do të japim maksimumin me një lojë të mirë. Le ta fitojë ndeshjen ai që e meriton.