Tifozët e Manchester City dhe Pep Guardiola shijuan një fundjavë fantastike. Kampionët e Anglisë triumfuan 6-3 në derbin ndaj Manchester United, duke konfirmuar dominimin e tyre në përballjen ndaj “armiqve” të përjetshëm.
Erling Haaland dhe Phil Foden realizuan nga një tregolësh, ndërkohë që trajneri Guardiola analizoi për mediet fitoren tenistike ndaj skuadrës së Ten Haag. “Fitore e madhe, me një ndeshje të mrekullueshme.
Të gjithë ishin të lumtur, ne dhe tifozët, të shijon shumë fitorja ndaj rivalëve. Sulmuesit tanë bënë diferencën. Perfeksioni nuk ekziston, por duhet të përpiqemi të shkojmë drejt tij.
Bëmë disa gabime në pasime, diçka që nuk duhet të ndodhë“, deklaroi Guardiola, i cili u ndal edhe te dy golashënuesit e ekipit të tij.
“Numrat e Haaland flasin vetë, janë të frikshme. Ne përpiqemi ta ndihmojmë. Uria e tij është thjesht e pabesueshme.
Foden meriton gjithçka, ka cilësi. Dëshira dhe mënyra si vrapon janë gjëja kryesore. Ai është një realitet tashmë”, deklaroi trajneri spanjoll i kampionëve në fuqi të Anglisë.