Ndeshja e tij më e mirë në Kategorinë Superiore erdhi në momentin e duhur për Sindrit Gurin. Me tregolëshin që realizoi në fitoren 4-0 ndaj Partizanit, Guri ishte thjeshtë fantastik me 24-vjeçarin që me meritë u përzgjodh nga Supersport si lojtari më i mirë i ndeshjes.
“Kjo ndeshje erdhi në kohën e duhur dhe në momentin e duhur për mua. Këto tre gola sot ndaj Partizanit do më ndihmojnë të punoj më shumë dhe të rritem më tepër”.
3 gola që mund t’i shërbejnë Gurit për të fituar një ftesë në kombëtare në grumbullimin e ardhshëm të përfaqësueses kuqezi.
“ E kam thënë gjithmonë që për çdo lojtar që luan në kampionatin shqiptar, kombëtarja kuqezi është një ëndërr. Unë do të përpiqem të bëj më të mirën time dhe pastaj i takon trajnerit për të vendosur nëse jam apo jo gati për kombëtaren shqiptare”.
E ardhmja e tij vazhdon të mbetet në pikëpyetje me Gurin që e pranon se mund të largohet nga Kukësi në verë por vetëm në rast se klubi do të përfitojë një shumë të majme nga shitja e tij.
“ Do të bisedoj me drejtuesit e klubit dhe do të arrimë të gjejmë një gjuhë të përbashkët, pra atë që do të jetë më e mira për të dyja palët.Unë jam nën kontratë me Kukësin dhe nëse largohem do të ishte shumë mirë që presidenti Gjici i cili investon shumë të mëdha të kjo skuadër, të përfitojë nga largimi im në një kampionat tjetër”.