Aksident i bujshëm që në xhiron e parë të Çmimit të Madh të Britanisë, mes Max Verstappen dhe Lewis Hamilton. Nga kontakti mes dy makinave, Red Bull dhe Mercedes, e pëson Verstappen, i cili rrezikoi shumë pasi makina e tij bëri disa rrotullime para se të përplasej me barrierat anësore. Momente frike për holandezin, i cili më pas doli në këmbët e tij. Gara u ndal menjëherë, me Leclerc në avantazh.
Gara nisi e ashpër me një duel deri në vdekje mes Hamilton dhe Verstappen, me britanikun që kërkoi me çdo kusht të parakalonte rivalin e tij. Dinamikat e aksidentit janë të diskutueshme, flamuri i kuq i menjëhershëm ngriu garën me Leclerc në epërsi.
“Shikoni kthesën, aksident i madh. Është 100% një kthesë në favor të Max, i gjithë faji është i Hamiltonit. Faleminderit Zotit që doli i padëmtuar”. Këto ishin fjalët e Horner për FIA-n përmes radios pas kontaktit midis makinave Red Bull dhe Mercedes.
Komisarët e garës i dhanë vetëm 10 sekonda penalitet Hamiltonit, por gjithsesi piloti britanik arriti të triumfonte në Silversonte duke e parakaluar pilotin e Ferrarit, Leclerc, në xhiron e parafundit. Diferenca mes Verstappenit dhe Hamiltonit në renditjen e përgjithshme ngushtohet nga 33 në 8 pikë.
