Eldorjan Hamiti dhe Juxhin Xhaja janë dy gjyqtarët që marrin stemën e FIFA-s, duke zëvendësuar Andi Koçin dhe ish-arbitrin Lorenc Jemini. Ata plotësojnë treshen e arbitrave ndërkombëtarë përkrah Enea Jorgjit.
Sektori i arbitrave në Federatën Shqiptare të Futbollit ua ka besuar stemat e FIFA-s dy arbitrave të rinj, të cilët kanë qenë më pak të kontestuarit në kampionatin shqiptar, pavarësisht se polemikat nuk mungojnë asnjëherë.
Hamiti është në sezonin e tij të tretë në Kategorinë Superiore dhe njihet për rreptësinë që shfaq në lojë, duke mos i kursyer ndëshkimet për të mbajtur çdo situatë nën kontroll, me mesatarisht mbi 5 kartonë të verdhë në ndeshje.
Në dy takime të drejtuara gjatë këtij sezoni, Teuta-Luftëtari dhe Lushnja-Kukësi, arbitri nga Lezha ka nxjerrë në total 8 kartonë të verdhë dhe dy të kuq.
Megjithatë, episodet e debatueshme nuk kanë munguar, si ai i sezonit të kaluar, kur në ndeshjen Skënderbeu-Tirana, me një penallti në favor të vendasve dhe një tjetër 11-metërsh të paakorduar për bardheblutë.
Juxhin Xhaja është gjithashtu ndër arbitrat më të rinj dhe më premtues të futbollit në vend. Gjyqtari i kolegjiumit të Tiranës është në sezonin e dytë në Kategorinë Superiore dhe e merr stemën e FIFA-s në moshën 27-vjeçare.
Sezonin e kaluar fitoi besueshmëri në sfidën e 28 prillit ndërmjet Tiranës dhe Partizanit, ku u bë edhe gjyqtari më i ri që arbitron një derbi në Shqipëri.