Hasan Lika nuk është më trajner i Luftëtarit. Marrëveshja mes teknikut 58-vjeçar dhe klubit gjirokastrit përfundonte më 31 maj dhe aktualisht nuk ka asnjë detyrim kontraktual mes palëve.
Për momentin presidenti Tavo ende nuk e ka konfirmuar nëse do të tentohet një marrëveshje e re me Likën, apo do të provohet një tjetër rrugë, ndoshta me një trajner që do të vijë nga jashtë kufijve.
Lika e morri drejtimin e bluzinjve në muajin tetor kur skuadra po kalonte një moment krize. Nën drejtimin e tij Luftëtari arriti të konkretizonte rezultatin më të rëndësishëm në historinë e klubit, pjesmarrjen në Europa League.Në 30 takime në kampionat ai arriti të koleksiononte 15 fitore duke përmirësuar jo vetëm fazën sulmuese, por edhe atë mbrojtëse.
Në përfundim të edicionit, rinovimi u duk se do të ishte automatik për shkak të ecurisë unikale të kësaj skuadre, por diçka e tillë nuk ndodhi madje nuk ka pasur as bisedime për të gjetur një akord të mundshëm.
Në këtë mënyrë janë ndarë rrugët mes Hasan Likës dhe Luftëtarit, një histori dashurie e shkurtër dhe e zjarrtë e cila u mbyll me një fund të paparashikuar, nga sot tekniku 58-vjeçar rikthehet sportivisht “single”.