Kampionia e madhe e Kosovës në sportin e Xhudos, Majlinda Kelmendi, trajneri i saj Driton Kuka si dhe kreu u Federatës Kosovare të Xhudos, Agron Kuka, kanë marrë nga vetë presidenti i Kosovës, Hashim Thaçi, pasaportën diplomatike. Njoftimi i bë nëpërmjet një mesazhi në rrjetet sociale nga kreu i shtetit më të ri në Europë.
“Në mënyrë solemne, sot kam ndarë pasaportën diplomatike për xhudisten e artë, Majlinda Kelmendi, për trajnerin Driton Kuka dhe kryetarin e Federatës së Xhudos, Agron Kuka. Majlinda është ambasadorja më e çmuar e vendit tonë dhe personifikon suksesin e Republikës së Kosovës në botë”.
Këtë vlerësim e ka mirëpritur edhe trajneri i saj, Driton Kuka, që ka reaguar gjithashtu në Facebook.
“Presidenti Thaçi i dha solemnisht pasaportën diplomatike, kampiones olimpike. Ambasadorja më e mirë e vendit dhe popullit tim. Presidentit, kryeministrit Haradinaj dhe stafit në Ministrisë së Punëve të Jashtme u jemi mirënjohës për avancimin e kësaj çështjeje. Besoj që e ka merituar”.