Alex Meret po dhuron paraqitje shumë të mira me Napolin këtë sezon, teksa e nisi si titullar miqësoren Shqipëri-Itali (1-3) që u zhvillua të mërkurën në mbrëmje në “Air Albania”.
Portieri friulan foli për shtypin italian rreth takimit ndaj kuqezinjve të Edi Rejës. 25-vjeçari vlerëson fitoren, por thekson se duhej evituar goli i pësuar nga Ardian Ismajli.
“Ishte një test i mirë, edhe pse ishte një ndeshje miqësore. Ne donim të fitonim, ia dolëm, por ndjej keqardhje për golin e pësuar. Ndoshta mund ta kishim shmangur…
Edhe në pjesën e dytë rrezikuam shumë të ndëshkoheshim, por u treguam të aftë duke realizuar golin e tretë dhe duke mbyllur ndeshjen”, deklaroi Meret, i cili zhvilloi ndeshjen e parë si titullar me katër herë kampionët e botës.
