Formula 1, një nga sportet më të ndjekur në të gjithë botën dhe çdo ditë e më shumë po tregon zhvillime të vrullshme nga ana teknologjike. Ideja e fundit e hedhur nga drejtori sportiv i Formula 1, Ros Brawn, është ajo e përdorimit të motorëve elektrikë për makinat e këtij sporti.
Sipas ish-numri 1 të Ferrarit, diçka e tillë mund të ndodh brenda një periudhe 5 ose 10 vjeçare dhe se askush nuk mund ta kundërshtojë një vendim të tillë. Sipas Brawn, Formula 1 po zhvillohet në një mënyrë që të sigurojë ekuilibrin e duhur midis sportit, rëndësisë dhe përfshirjes me tifozët.
Ideja për të futur motorët elektrikë te këto makina, bazohet te shembulli i Formula E, një kategori tjetër e garave me katër rrota, ku makinat përdorin motor elektrik. Por sipas britanikut, pavarësisht përpjekjeve për implementimin e motorëve elektrikë tek makinat që garojnë në Formula E, këto gara ende nuk e kanë ritmin e duhur, duke theksuar se shpesh herë garat bëhen të mërzitshme, pasi makinat nuk e kanë shpejtësinë e duhur.
Megjithatë po nga Formula E vjen dhe kundërshtimi i parë për një projekt të tillë. Ka qenë shefi i kësaj kategorie, Alejandro Agag, i cili deklaroi se ideja e Ros Brawn nuk mund të vihet në zbatim deri në vitin 2039, pasi Formula E ka një marrëveshje me FIA për 25 vjet sa i përket përdorimit te motorëve elektrikë. Agag shtoi se vetëm duke folur me të, drejtuesit e Formula 1 mund të arrijnë një kompromis për të vënë në zbatim projektin në fjalë