Sulmuesi argjentinas i Milanit, Gonzalo Higuain shoqëronte Gattuson në konferencën për shtyp, në prag të sfidës për Ligën e Europës, përballë Duddelange. Ai mohoi zërat se po mendon largimin nga kuqezinjtë dhe theksoi se është i përqendruar të japë më të mirën për klubin kuqezi.
“Mendja ime është tek Milani. Nuk ndihem një yll, jam një futbollist i cili është marrë për të arritur objektivat e caktuara. Shpresoj të ecim shumë në Europa League, dhe të arrijmë zonën Champions në kampionat”, deklaroi Higuain.
Sulmuesi argjentinas i kuqezinjve komentoi edhe një afrim të mundshëm të Zlatan Ibrahimoviç te kuqezinjtë, ndërsa shprehu vlerësime maksimale për partnerin e tij në sulmin e Milanit, Patrick Cutrone.
“Për sa i përket Ibras, ai është një lojtar i madh, por për merkaton do ende kohë, ndaj duhet të përqendrohemi te ndeshja e nesërme. Pastaj, këtu kemi dhe një djalosh si Cutrone, të cilit dua t’i mësoj çdo gjë që di”, tha sulmuesi i Milanit. .