Adrenalinë, të shtysh veten në ekstrem, të shpenzosh pa fund të ardhura, të rrezikosh si askush për një pasion që nuk ka të krahasuar më asgjë tjetër. Emocionet, të dridhurat, qetësia e miksuar me ankthin e një shpejtësie marramendëse. Për ata që nuk e kanë provuar duket e tepruar por, të pyesin një herë pilotët se çfarë do të thotë të futesh në kështjellën e tyre, në ëndrrat e tyre dhe të ecësh me 200 km/h.
Ky pasion udhëheq edhe vizionin e Auto Club Albania që për herë të 6-të organizoi në Shqipëri “Hill Climbing” trofeun Skënderbej me rreth 40 pilotë nga Shqipëria dhe vende të ndryshme të Europës që provuan vështirësitë dhe magjinë e Malit të Krujës në garën kronometrike për triumfin përfundimtar. Një evenimetin unikal në Shqipëri, i cili është pjesë e kalendarit të Federatës Ndërkombëtare të Autombilizmit FIA e njëjta federatë që organizon Formulën 1 dhe që në çdo edicion ka dhuruar emocione që vështirë të përjetohen diku tjetër. Sekretari i përgjithshëm i Auto Club Albania, Eridon Lameborshi tregon për vlerat e një evenimenti të tillë dhe rritjen e interesit kundrejt sporteve të shpejtësisë, pa anashkaluar projektet që Auto Club Albania ka për të ardhmen.
“Automobilizmi është një sport i kushtueshëm, pasi duhen llogaritur makina, siguria e saj, siguria e personit, etj., sepse nuk mjafton vetëm pasioni. Gjithsesi prania e këtyre pilotëve këtu, do të thotë që ka një zhvillim të motosportit në Shqipëri, ndërsa ne po kontribuojmë që pasioni të mos venitet. Vitin e ardhshme besojmë se do të jemi gati për të zhvilluar kampionatin e “Cross-Car””, tha Sekretari i Përgjithshëm i Auto Club Albania, Eridon Lameborshi.
Gara ishte e ashpër në aspektin sportiv të fjalës, sidomos mes dy konkurrentëve kryesorë në nivelin profesionist, hungarezi Lazlo Saz dhe piloti nga Kosova Bardhyl Canolli, gjithsesi në fund Saz i cili drejtonte një Reynard Zetech e ngjashme me njëvendëshet e Formulës 1 ja doli që me kohën 2 min 12 sek e 9 të qindtat të ishte pilot më i shpejtë duke merituar edhe trofeun
“Asnjë garë nuk konsiderohet e thjeshtë ,të administrosh këtë automjet në moshën time 52-vjeçare nuk është e thjeshtë. Fitova dhe jam i lumtur, edhe pse mund të bëja një kohë edhe më të shpejtë. Gara ishte në ngjitje dhe për mua është krejtësisht diçka e re sepse nuk e njihja aspak itinerarin. Besoj se vitin tjetër do e bëj edhe më mirë sepse kam ndërmend të rikthehem sërish, por nuk është asnjëherë e thjeshtë, bëhet një punë e madhe në prapaskenë. Sa pasion kam investuar në këtë sport?! 200% ndoshta 250”, tha piloti hungarez.
Canolli është një ndër pilotët me më shumë përvojë në rajon dhe nën drejtimin e një Radicali SR8 Lm tentoi me pedalin e gazit në maksimum të siguronte kohën më të shpejtë të përgjithshme, por nuk ia doli, ndonëse kjo nuk e zbeh performancën e pilotit të skuderisë Eurogoma.
13 pilotë garuan në kategorinë promo ku më i shpejti rezultoi Lulzim Loci i ndjekur nga Gentjan Shaqiri e Julian Sami, një kategori që shërben si frymëzim për të gjitha ata që e dashurojnë shpejtësinë. Auto Club Albania ka ndërmarrë një mision të cilin ka ndërmend ta dërgojë deri në fund, t’i dhurojë mundësinë e të përjetuarit të adrenalinës në nivelet maksimale. Sportet e shpejtësisë nuk vijnë pa çmim, por ia vlen të paguash për diçka që nuk e gjen askund.
