Askush nuk është imun nga Coronavirusi. Edhe njerëzit e famshëm, në njëfarë mënyre, janë treguar “të pakujdesshëm” në sjellen e tyre, duke u bërë bartës së armikut global. Nga Kina, ku pati vatrën, ka mbërritur në cepat e më të largët të shtëpisë së përbashkët tokë. Ka mbërritur edhe në Brazil, ku ka prekur skuadrën e njohur Flamengo, që në javët e fundit të vitit të kaluar fitoi dy kompeticione, “Brasileirão” dhe “Copa Libertadores”. Njoftimi u bë në faqen zyrtare të klubit brazilian:
“Flamengo informon se testet për praninë e COVID-19 te lojtarët, stafi teknik dhe drejtuesit përfunduan pasditen e së hënës. Klubi informon se trajneri Jorge Jesus ka rezultuar i prekur në provën e parë nga COVID-19. Analiza nuk është përfundimtare. Testi i dytë do të saktësojë gjithçka.
Trajneri është nën kujdesin e stafit mjekësor të Flamengos dhe shëndeti i tij mbetet i qëndrueshëm… Klubi njofton pezullimin e stërvitjes së ekipit të parë dhe ekipeve të të rinjve për të paktën një javë.
Gjithë të tjerët në klub rezultuan negativë për COVID-19. Ne do të ndjekim udhëzimet e Ministrisë së Shëndetësisë gjatë pandemisë”.
Vetëm pak kohë më parë, Jorge Jesus kishte humbur për shkak të Coronavirusit një mik, të cilin e kishte takuar në Portugali. Bëhet fjalë për 80-vjeçarin Mario Verissimo, i cili ka punuar së bashku me trajnerin portugez në kohën kur drejtonte Estrela Amadora.