Shqipëria në vitin 2016 shkroi historinë duke u përfshirë për herë të parë në finalet e kampionatit Europian, të njëjtën gjë bëri edhe Skënderbeu më 2015-ën duke siguruar pjesmarrjen në grupet e Europa League, historik ishte edhe muaji tetor për futbollin tonë, natyrisht jo me madhështinë e suksesve të sipërmendura por gjithsesi një arritje për t’u vendosur në kornizë. Enea Jorgji u bë gjyqtari i parë shqiptar që drejtonte një ndeshje në grupet e Europa League, më konkretisht takimin mes qipriotëve të AEK Larnacas dhe bullgarëve të Ludogorets. Arbitri elbasanas tregon emocionet e atij momenti si dhe ndryshimin që ka një ndeshje e kompeticioneve europiane me kampionatin shqiptar.
Paraqitja e Jorgjit në Europa League ishte mjaft pozitive dhe këtë e vërtetoi edhe fakti që UEFA i caktoi një tjetër ndeshje në Uefa Nations League ku 34-vjeçari sëbashku me trupën e gjyqtarëve shqiptarë do të vendosë drejtësi në takimin mes Hungarisë dhe Estonisë.
Sportistët udhëhiqen nga ëndrrat e njëjta gjë ndodh edhe me gjyqtarët, pavarësisht se Jorgji nuk e thotë konkretisht majën e ambicieve të tij, dëshira është për t’u ngjitur sa më lart në kompeticionet europiane.
Në Superiore këtë sezon i janë dhuruar hapësira shumë gjyqtarëve të rinj, sipas atij që konsiderohet më i miri në këtë rol, kjo është një politikë që do të sjellë zhvillim.
