Matthijs De Ligt ishte një nga transferimet më të bujshme të Bayern Munich në verën e kaluar me bavarezët që shpenzuan plot 68 milionë paund, para të cilat përfunduan në arkën e Juventus. Por, ky investim i guximshëm nga ana e drejtuesve bavarezë është gjithnjë e më shumë në pikëpyetje me holandezin që ende nuk ka bindur dhe nuk konsiderohet një prej titullarëve të rekordmenëve gjermanë.
Edhe me trajnerin Thomas Tuchel, 24-vjeçari e ka nisur nga stoli sezonin me teknikun gjerman që preferon dhe i beson më shumë dyshes Kim Min Jae dhe Upamecanos. Nga Gjermania bëjnë të ditur se një nga aspektet që më së shumti e shqetëson Tuchel në lidhje me De Ligt janë pasimet e shumta horizontale të mbrojtësit ndërsa nga tekniku 50-vjeçar holandezi konsiderohet edhe i avashtë.
Lexoni edhe:
- Triumfi ndaj Rumanisë, Duka: Urime Kombëtares U21 për fitoren që na dhuroi emocione të mëdha!
- FOTO/ Reagon sërish Vojvoda: Turp për Rumaninë, krenaria jonë më e madhe që jemi shqiptarë!
- “Dëmtim i karakterit dhe imazhit profesional”, Bonucci hedh në gjyq Juventusin
- Pas super formës me Kombëtaren, Ramadani nis menjëherë punën me Lecce për transfertën e Monzas
Nga ana tjetër, pavarësisht vështirësive, në klubin bavarez janë të gatshëm t’i japin edhe një shans të fundit mbrojtësit pasi në stërvitje shihet dëshira e holandezit për t’u përshtatur me futbollin e Tuchel.
De Ligt ende nuk ka hequr dorë nga ëndrra për t’u shndërruar në një prej lojtarëve më të rëndësishëm të Bayern Munich, por tashmë kohën e ka të limituar. Nëse skenarët nuk ndryshojnë deri në fundin e sezonit, atëherë drejtuesit mund ta nxjerrin në merkato verën e ardhshme pavarësisht kontratës që i lidh palët deri në vitin 2027.
