Penalltia është një “detyrim” që kërkon shumë fat, sidomos në një finale Kupe Bote, aty ku sytë dhe zemrat e miliona tifozëve janë mbi ty. Presioni është i madh, të gjithë presin që të shënohet gol, përndryshe pasojat dihen.
Kështu ndodhi edhe me Kingsley Coman, një nga dy francezët që dështuan të shënonin nga pika e bardhë në finalen e Kupës së Botës ndaj Argjentinës. Emiliano Martinez priti goditjen e sulmuesit të Bayernit.
Përveç ndjenjës së fajit që do e shoqërojë gjatë, Coman po përballet edhe me sulmet dhe zemërimin e tifozëve francezë, të cilët kanë shpërthyer në komente raciste ndaj tij në rrjetet sociale.
Kampionët e Gjermanisë kanë reaguar në lidhje me situatën e vështirë të 26-vjeçarit, i cili ka përfunduar në “gijotinën” e tifozëve bashkë me Aurelien Tchouamenin e Realit të Madridit.
“Bayern Munich dënon ashpër komentet raciste të bëra kundër Kingsley Coman. Familja e Bayernit të mbështet, racizmi nuk ka vend në sport dhe në shoqërinë tonë”, lexohet në komunikatën mbështetëse për lojtarin.
