Rekordet dhe Cristiano Ronaldo janë një dyshe e pandarë e destinuar të mbetet e tillë përsa kohë portugezi do të jetë pjesë e botës së futbollit. CR7, shënoi të shtunën në ndeshjen ndaj Arsenal në disfatën e Manchester United me rezultatin 3-1, megjithatë pavarësisht hidhërimit të humbjes, luzitani mund t’i gëzohet rekordit të radhës.
Goli ndaj Arsenal ishte realizimi numër 100 në elitën e futbollit anglez për 37-vjeçarin, ndërsa Ronaldo e ka arritur këtë shifër edhe në Spanjë madje e ka tejkaluar teksa me fanellën e Real Madrid vetëm sa i takon La Liga-s ka shënuar 311 gola.
Në këtë formë, Ronaldo bëhet i pari futbollist që prek kuotën e 100 golave në dy nga kampionatet më elitarë të Europës si ai i Premier League dhe La Liga. Ndërkaq, Ronaldo shënoi 101 gola në aventurën e tij me Juventus, por sa i takon Serisë A, portugezi u ndal në kuotën e 81 realizimeve.