Një mesfushor me tipare sulmuese, që të luante pas shpinës së Icardit, ishte ëndrra e merkatos së verës, për Luciano Spallettin, por që nuk u bë realitet. Nainggolan dhe Vidal ishin emrat e lakuar më së shumti, por në fund shoqëria zikaltër vendosi t’i japë një shans portugezit Joao Mario, i cili deri tani nuk po bind aspak. Pikërisht për këtë arsye, drejtuesit e Interit dhe trajneri Spalletti, janë duke skicuar emrat më të mundshëm që mund të afrohen në merkaton e janarit.
Fantazisti i Arsenal, Mesut Ozil është emri më i bujshëm, që ka dalë në skenë në orët e fundit, si një nga objektivat konkretë të zikaltërve. Gjermanit i skadon kontrata me “Topçinjtë”, në qershor të 2018-ës dhe marrëdhëniet aspak të mira me trajnerin Arsen Wenger, e kanë shtyrë që të mos pranojë rinovimin.
Inter është gati të bëjë një ofertë për të afruara Ozil, që në muajin janar dhe Arsenal do të shmangte largimin e tij me parametra zero, në qershor të vitit të ardhshëm. Krahas kostos së ulët, drejtuesit zikaltër do t’i ofronin Spallettit mesfushorin e ëndrrave, një fantazist të klasit të lartë, që di të shënojë edhe gola.
