Zlatan Ibrahimovic duket se nuk ka ndërmend të rinovojë kontratën me Milanin dhe drejtuesit e klubit kuqezi kanë nisur nga puna për të gjetur një tjetër qendërsulmues, që të marrë përsipër rolin e bomberit në skuadër, duke filluar nga sezoni i ardhshëm.
Emri në krye të listës së Administratorit të Milanit, Ivan Gazidis, është ai i polakut Akradiuz Milik, qendërsulmuesi i Napolit, që gjithashtu dëshiron të largohet këtë verë dhe këtë ua ka bërë të qartë edhe drejtuesve të klubit.
Sulmuesit 26-vjeçar polak i përfundon kontrata me Napolin në verën e 2021-shit dhe nuk ka ndërmend të rinovojë, ndaj presidenti De Laurentiis është në pritje të ofertave për kartonin e tij, të cilin e vlerëson rreth 30-35 milionë euro.
Kjo shifër përshtatet edhe me parametrat e klubit të Milani, ashtu si paga e sulmuesit që është 2.2 milionë euro, duke qenë se Gazidis nuk ka ndërmend të afrojë lojtarë që fitojnë më tepër se 3 milionë euro në sezon.
Sa i përket pjesës tjetër të repartit të avancuar, duket i konfirmuar sulmuesi kroat Ante Rebiç, që është shprehur mjaft mirë në pjesën e parë të këtij viti, duke shënuar shumë gola dhe duke u përshtatur mjaft mirë me lojën e kuqezinjve.
I njëjti diskutim vlen edhe për portugezin Leoa, që natyrisht ka nevojë të fitojë më shumë eksperiencë, por ka treguar se nuk i mungon klasi dhe do të ishte shumë i përshtatshëm për të bërë rezervën e parë të dyshes sulmuese.
Nëse negociatat do të shkojnë me sukses dhe Milik do të veshë fanellën kuqezi, atëherë tifozët e Milanit do të kenë mundësi të “dashurohen” me një tjetër sulmues polak, pas Piatek, i cili nuk ia doli në aventurën e tij në Milano.
