Milani merr një lajm shumë të keq vetëm pak orë para sfidës europiane ndaj norvegjezëve të Bodo Glimt e vlefshme për turin e tretë kualifikues të Europa League. Zlatan Ibrahimovic ka rezultuar pozitiv me COVID-19 në përgjigjet e testeve që kanë dalë mesditën e sotme dhe nuk rrezikon vetëm këtë sfidë por edhe duelet ndaj Crotones dhe Spezias në kampionat dhe ndeshjen e fazës play-off në Europa League në rast kualifikimi të Milanit ndaj Bodo Glimt.
Sulmuesi suedez duhet të izolohet dhe të presë rezultatin e testit të dytë për t’u bashkuar me pjesën tjetër të skuadrës. Më parë te Milani kishte dalë i infektuar mbrojtës Leo Duarte. Në kampin kuqezi më pas janë testuar të gjithë futbollistët dhe Ibra ka dalë pozitiv, gjë që konfirmohet edhe nga Milani. Suedezi dhe lojtarët e tjerë ishin testuar edhe më parë, sipas protokollit të UEFA-s. Gjithsesi ndeshja ndaj Bodo Glimt nuk është në rrezik dhe do të luhet mbrëmjen e sotme pasi të gjithë lojtarët e tjerë kanë rezultuar negativ, problemi i madh qëndron te fakti se Milani ka mbetur pa qëndërsulmues pasi Rebic është i skualifikuar ndërsa Leao i dëmtuar, kështu që në fushë për të zëvendësuar Ibrën do të zbresë i riu Colombo.
