Ndonëse vinte pas 5 ndeshjesh pa fitore, 4 prej të cilave të humbura, Laçi arriti të zhvlerësojë avantazhin e dyfishtë të Skënderbeut, për t’u rikthyer te fitorja, që i sjell qetësi skuadrës.
Nuk është asnjëherë e thjeshtë të kthesh në favor një dizavantazh të dyfishtë, aq më shumë kur përballë ke një ekip me potencial absolut sikundër është skuadra korçare.
Ky sukses i firmosur nga i përhershmi Reginaldo ,i ngjiti bardhezinjtë në vendin e 4-t, pozicion që do t’i dhuronte Laçit pjesëmarrjen në Europa League, një objektiv që në fillim të sezonit nuk ishte në listën e klubit kurbinas, por që sot është shumë pranë për ekipin e Gentian Mezanit.
Fati deshi që kjo përmbysje të finalizohej kundër skuadrës që përbën pengesën e fundit për laçianët në rrugën drejt triumfit në Kupën e Shqipërisë. Pa diksutim që kjo sfidë e fituar nuk do të thotë asgjë në lidhje me finalen e 27 Majit, ajo është një sfidë krejt tjetër dhe Skënderbeu do të vijë me maksimumin motivimit, megjithatë është fakt që në këtë sezon bilanci është në baraspeshë të plotë 2 fitore për secilin ekip.
Ka ende kohë deri në mbrëmjen e finales, por nëse dikush kërkonte një sinjal për të shtuar kreditet e Laçit në Kupë, atëherë takimi i fundit është sinjali më i mirë i mundshëm.
