Kamza ka arritur akordin me Bledar Devollin, për t’i besuar pankinën për sezonin e ardhshëm. Lajmi është bërë i ditur nga vetë klubi kamzali, nëpërmjet një deklarate në faqen zyrtare. Devolli do të ketë si ndihmës të tij Jurgen Agollin dhe Eldi Topin, ndërsa Bledar Vashaku do të jetë trajneri i portierëve.
Ish mesfushori i njohur gjirokastrit do të zërë vendin e italianit Pietro Vierchowod, i cili u prezantua te Kamza sapo mbaroi sezoni i kaluar, por më pas preferoi të mos vijë në Shqipëri.
Devolli ka një karrierë të pasur si futbollist, pasi ka luajtur me skuadra si Vllaznia, Luftëtari, Tirana, Partizani, Skënderbeu, Flamurtari, etj., ndërsa si trajner ka drejtuar Luftëtarin, Bylisin dhe skuadrën kosovare, KEK, në Kategorinë e Parë.
Për gjirokastritin bëhet fjalë për një rikthim në pankinën e Kamzës, pasi ka drejtuar këtë klub në sezonin 2016-2017, kur militonte në Kategorinë e Parë.