Lorenzo Insigne zhgënjen tifozët e Napolit. Nuk është fjala për të ardhmen e tij apo për cilësitë teknike që i ka të padiskutueshme, por për një deklaratë që nuk mund t’u ketë pëlqyer mbështetësve të zjarrtë napolitanë.
Gjatë një prononcimi për mediat italiane, ku kujtoi disa nga episodet më emocionuese të karrierës së tij, sulmuesi 26-vjecar deklaroi se idhulli i tij është një ish-juventin, Alessandro Del Piero. Sipas Insignes, De Piero, përvecse një futbollist i madh, është edhe një njeri për t’u marrë shembull.
Sulmuesi i Napolit kujton me zhgënjim se nuk e kishin pranuar si te Torino ashtu edhe tek Interi për shkak të trupit të vogël. Falë refuzimit të tyre, tashmë është një nga lojtarët më të mirë të Napolit. Të paktën për këtë fakt tifozët napolitanë duhet të ndihen më fat.
