Kristjan Asllani ka zgjedhur ekipin e ri. Mesfushori shqiptar, i cili ia doli të fitojë një fanellë titullari me Empolin sezonin e kaluar duke dhuruar paraqitje shumë të mira në Serie A, ka arritur akordin me Interin.
Gazetari Fabrizio Romano shkruan se drejtuesit e klubit zikaltër kanë gjetur gjuhën e përbashkët me 20-vjeçarin nga Elbasani për kushtet personale, me mesfushorin që cilësohet si pasardhësi i kroatit Brozovic.
Për shërbimet e Asllanit ishte në garë edhe Milani. Paolo Maldini e donte pjesë të skuadrës së Piolit, por tek Interi janë shfaqur më bindës në bisedimet me agjentin dhe lojtarin shqiptar.
Tani duhet arritur akordi me klubin toskan, që kërkon rreth 15 milionë euro për kartonin e lojtarit të talentuar të kombëtares, që golin e parë në Serie A e realizoi pikërisht ndaj Interit në “San Siro”.
Asllani zhvilloi 26 ndeshje me Empolin sezonin e fundit mes kampionatit dhe Kupës së Italisë, duke shënuar një gol dhe duke dhuruar dy asiste.
