Interi ka hedhur menjëherë pas krahëve humbjen me përmbysje në “Camp Nou” përballë Barcelonës dhe po përpiqet të përqendrohet te derbi i Italisë, ndaj Juventusit, sfidë që do të luhet të dielën në mbrëmje në “San Siro”.
Ndërkohë që Antonio Conte përpiqet të përgatisë më së miri të tijtë për të marrë maksimumin në këtë sfidë, drejtuesit e Interit duket se e kanë arritur objektivin ekonomik, pasi pritet të vendosin një rekord arkëtimesh nga stadiumi.
Sipas njoftimeve më të fundit, po shkohet drejt shitjes së të gjithë biletave, pra pak më tepër se 75 mijë, ndërsa përllogaritjet paraprake thonë se zikaltrit do të arkëtojnë rreth 6.5 milionë euro në total mes biletave dhe shërbimeve të mikpritjes në stadium.
Në “San Siro” të dielën në mbrëmje pritet të ketë njerëz nga më shumë se 100 kombësi të ndryshme, ndërsa mbi 20 % e biletave në total, janë shitur jashtë Italisë. Vlen të theksohet se derbi i Italisë pritet të transmetohet në më shumë se 200 vende të botës.